மரணம் தப்பிய கரணம்

தப்புமா
மரணக்குகைக்குள்
நுழைந்த உயிர்

சதை சிதைத்து
நிணமுறிஞ்சி
என்பு நொறுக்கி
குப்பையாய்ப்
புறந்தள்ளும்

குகைக்குள் நுழைந்து
உயிராய் வெளிவந்து
.................................
தேறுமா தேர்வு

மூச்சடக்கி
தம்பிடித்து
வெட்ட வந்ததை வெட்டி
கொத்த வந்ததை கொத்தி
நசுக்க வந்ததை நசுக்கி
நொறுக்க வந்ததை நொறுக்கி

தப்பிப் பிழைக்கும் வித்தை
உயிராய் வரும் சாகசம்

நமது
நம்மால்
நலம் பெற

துருவங்களின் இருப்பு

என்
தவறான பாதையில்
சரியான தடங்கள்
நிறைய

தவறும் சரியும்
விரவிக் கிடக்கும்
ஒன்றை யொன்று
உறுத்தாமல்

சரி தவறெனவும்
தவறு சரியெனவும்
மாற்றங்களும் நிகழும்
அவ்வப்போது

சரி தவறைத்
தவறெனவும்
தவறு சரியைத்
தவறெனவும்
சுட்டிக்காட்டலும்
சகஜம்

தவறு சரியை
ஆக்ரமித்தலும்
சரி தவறை
ஆகர்ஸித்தலும்
அதிசயமற்ற நிகழ்வுகள்

சரியும் தவறும் அப்பிய
வழிகளில்
இரண்டு மியல்பாய்க் கலந்தே
கிடக்கும்

படபடத்து

பறந்து வந்து

ஜன்னல் கம்பியில்

துடிதுடிக்கும்

பாலிதீன்

உயிர் அவஸ்தை

பையன்கள்

தூக்கிப் போட்ட

கூழாங்கற்களின் அதிர்வுகள்

பாம்புகளின் நடமாட்டம்

தவிர்த்து

ஆழ்ந்துறங்கும் பாழுங்கிணறு

வயி்றுகளின் பசியழிக்க

யோனி விற்று

இருத்தலியல் மெய்ப்பிக்க

வாழ்ந்திருக்கும் பெண்

யாருக்காக

பெ 
ய்

கி

ற

து

மழை